ملتان: (ويب ڊيسڪ) ايف آءِ اي جي اميگريشن سيل پاڪستان جي تاريخ جي سڀ کان وڏي ڪارروائي ڪندي ملتان ايئرپورٽ تي 16 ڪلو گرام سون سمگل ڪرڻ جي ڪوشش ناڪام بڻائي ڇڏي. ايف آءِ اي ترجمان جو چوڻ آهي ته مسافر جي سامان مان 16 ڪلو گرام سون هٿ ڪيو ويو آهي، جنهن ۾ مختلف وزنن جا 10 سون جا سڪا به شامل آهن. ترجمان جو چوڻ آهي ته جوابدار محمد تنوير دبئي وڃي رهيو هو، جوابدار اميگريشن ڪليئرنس لاءِ ڪائونٽر تي پنهنجو پاسپورٽ پيش ڪيو، اميگريشن دوران پڇيل سوالن تي هو اختيارين کي مطمئن نه ڪري سگهيو. ايف آءِ اي ترجمان جو چوڻ آهي ته جوابدارن جي سامان کي بار بار جاچ لاءِ طلب ڪيو ويو، تلاشي دوران جوابدارن جي سامان مان 16 ڪلو سون هٿ ڪيو ويو. ترجمان جو چوڻ هو ته سمورن لاڳاپيل ادارن کان ڪليئر ٿيڻ کانپوءِ جوابدار جي سامان جي چيڪنگ ڪئي وئي، جوابدارن سامان بيگ جي ڳجهي خاني ۾ لڪايو هو، گرفتار جوابدارن خلاف جاچ جو دائرو وسيع ڪيو ويو آهي.
