پاڪستان ۽ گڏيل عرب امارات کي واپار، معيشت، هوابازي، قابل تجديد توانائي، موسمياتي تبديلي ۽ انساني وسيلن جي ترقي جي شعبن ۾ تعاون کي فروغ ڏيڻو پوندو: صدر آصف علي زرداري
اسلام آباد (م ڊ ) صدر آصف علي زرداري سان گڏيل عرب امارات جي سفير عماد عبيد ابراهيم سليم الزابي ملاقات ڪئي جنهن ۾ صدر گڏيل عرب امارات سان ٻطرفي تعاون جي شعبن ۾ لاڳاپا وڌيڪ وڌائڻ جي ضرورت تي زور ڏنو. ايوان صدر جي پريس ونگ موجب صدر آصف علي زرداري ملاقات دوران چيو ته واپار، معيشت، هوابازي، قابل تجديد توانائي، موسمياتي تبديلي ۽ انساني وسيلن جي ترقي جي شعبن ۾ تعاون کي فروغ ڏيڻو پوندو. ايئر بس اي – 380 جي ڪمرشل اڏامن جي شروعات سميت هوابازي جي شعبي ۾ تعاون وڌائڻ جي ضرورت آهي. هوابازي جي شعبي ۾ وڌندڙ تعاون سان گڏيل عرب امارات ۾ رهندڙ پاڪستانين کي سهولت ملندي. هن چيو ته اماراتي ڪاروباري ادارا پاڪستان اسٽاڪ ايڪسچينج ۾ سيڙپڪاري ڪن. اماراتي ڪاروبار پاڪستاني معيشت ۾ جديد خيال ۽ سيڙپڪاري آڻي سگهي ٿو. هن چيو ته پاڪستان تمر جي ٻيلن ۾ سيڙپڪاري ڪري رهيو آهي. پاڪستان ۽ گڏيل عرب امارات کي ڪاربن ڪرڊيٽس جي مارڪيٽ مان گڏيل طور تي فائدو کڻڻ گهرجي. پاڪستان پاڻي جي زيان تي ضابطو آڻڻ، زرعي پيداوار وڌائڻ جي لاءِ واهن جي لائيننگ جا منصوبا شروع ڪيا. صدر چيو ته پاڪستان ۽ گڏيل عرب امارات کي نئين ٽيڪنالاجيز جي حصيداري، زرعي شعبي ۾ تعاون وڌائڻ جي ضرورت آهي. موسمياتي تبديلين جي ڪري غذائي تحفظ جو مسئلو خطي جي لاءِ ڳڻتي جو سبب آهي. اماراتي سفير چيو ته گڏيل عرب امارات پاڪستان جي ترقي جي لاءِ پرعزم آهي. پاڪستان سان بيٺل رهنداسين. پاڪستان ۽ گڏيل عرب امارات جي وچ ۾ موجوده ٻطرفن لاڳاپن کي اسٽريٽجڪ پارٽنرشپ ۾ بدلائڻ جي ضرورت آهي. ان موقعي تي گڏيل عرب امارات جي سفير اقتصادي سفارتڪاري تي ڌيان ڏيڻ جي ضرورت تي زور ڏيندي چيو ته گڏيل عرب امارات جون وڏيون ڪمپنيون پاڪستان ۾ مختلف شعبن ۾ سيڙپڪاري ڪرڻ جون خواهشمند آهن. گڏيل عرب امارات تازو ئي ماحولياتي ڪانفرنس جي ميزباني ڪئي. گڏيل عرب امارات ”لاس اينڊ ڊيميجز“ فنڊ جي لاءِ 100 ملين ڊالر جو واعدو ڪيو. هن چيو ته فنڊ سان عدم تحفظ جي شڪار ملڪن کي موسمياتي تبديلي جي منفي اثرن کي منهن ڏيڻ ۾ مدد ملندي. پاڪستان موسمياتي تبديلين جي اثرن کي گهٽ ڪرڻ جي لاءِ فنڊ مان فائدو کڻي سگهي ٿو. اماراتي سفير صدر آصف علي زرداري کي ٻيو ڀيرو صدر بڻجڻ تي مبارڪباد ڏني. سفير گڏيل عرب امارات جي قيادت ۽ عوام پاران نيڪ خواهشن جو اظهار پڻ ڪيو. اماراتي سفير صدر کي گڏيل عرب امارات جي دوري جي دعوت ڏني، جنهن کي صدر قبول ڪيو. صدر مبارڪباد جي پيغامن تي گڏيل عرب امارات جي قيادت جا ٿورا مڃيا. گڏيل عرب امارات منهنجي دل جي تمام ويجهو آهي. صدر ٻنهي ملڪن جي وچ ۾ ڀائراڻا لاڳاپا وڌيڪ مضبوط بڻائڻ جي ضرورت تي پڻ زور ڏنو.
