ملتان: (م ڊ ) پوليس ملتان ۾ سينئر سياستدان جاويد هاشمي جي گهر جو گهيراءُ ڪري ورتو آهي. پي ٽي آءِ باني عمران خان طرفان اميدوارن کي اڄ چونڊ ريليون ڪڍڻ جا حڪم جاري ڪرڻ کان پوءِ تحريڪ انصاف جي اميدوارن تياريون مڪمل ڪري رکيون آهن.لاهور مان حماد اظهر جي والد جي گرفتاري کان پوءِ پوليس ملتان ۾ سينئر سياستدان جاويد هاشمي جي گهر جو گهيراءُ ڪري ورتو آهي. ان حوالي سان جاويد هاشمي سماجي رابطن جي ويب سائيٽ ايڪس تي چيو آهي ته پوليس منهنجي رهائشگاهه جو گهيراءُ ڪري ورتو آهي. آئون سندن اهڙين ڪاررواين کان ڊڄڻ وارو نه آهيان. پوليس بنا ڪنهن ڏوهه جي ڪارروايون ڪري رهي آهي. ياد رهي ته جاويد هاشمي قومي اسيمبلي جي تڪ اين اي 149 تي چونڊ وڙهڻ تان هٿ کڻي ويو آهي. هن پي ٽي آءِ اميدوار عامر ڊوگر جي حمايت جو اعلان ڪيو آهي. جڏهن ته جاويد هاشمي جو ناٺي به پي ٽي آءِ جي ٽڪيٽ تان چونڊ وڙهي رهيو آهي.
