ڪوئٽه: (م ڊ ) ڪوئٽه ۾ خانگي اسپتال ڀرسان ڌماڪي جي نتيجي ۾ 3 ٻارن سميت 8 ڄڻا زخمي ٿي پيا آهن. شروعاتي ڄاڻ موجب ڌماڪو صوبائي گادي واري شهر زرغون روڊ تي خانگي اسپتال ڀرسان ڪچري جي ڍير ۾ ٿيو جنهن جي نتيجي ۾ 8 ڄڻا زخمي ٿي پيا. ريسڪيو ٽيمن موقعي تي پهچي زخمين کي فوري طور تي طبي امداد لاءِ اسپتال منتقل ڪري ڇڏيو. ڌماڪي ۾ زخمي ٿيندڙن ۾ 3 ٻارن سميت 8 ڄڻا شامل آهن. واقعي کان پوءِ پوليس جي وڏي نفري واقعي واري هنڌ پهتي جنهن علائقي کي گهيري ۾ آڻي شاهديون گڏ ڪري واقعي جي جاچ شروع ڪري ڏني آهي. هوڏانهن ڌماڪي جي نوعيت ڄاڻڻ جي لاءِ بم ڊسپوزل اسڪواڊ کي به طلب ڪيو ويو آهي. ايس ايس پي آپريشن موجب ڌماڪي سبب زخمي ٿيندڙ ٻار ڪچرو چونڊي رهيا هئا جڏهن ته ڌماڪي سبب پل جي ويجهو موجود هڪ ٽريفڪ پوليس اهلڪار به زخمي ٿيو گڏيل طور تي ڌماڪي ۾ 8 ڄڻا زخمي ٿيا آهن.
