دادو: (رپوٽر ) سيتاروڊ شھر ڀرسان جوھي برانچ ڪپ تي مبينا ڪارنهن الزام ھيٺ ڇهن ٻارن جي ماءُ بينظير قمبراڻي کي سندس ماءُ جي گھر اندر مڙس ۽ قتل ٿيل عورت جي ڀاءُ بيدرديءَ سان قتل ڪري ڇڏيو آهي. ان حوالي سان قتل ٿيل عورت جي امڙ ڌياڻيِ قمبراڻي چيو آھي تہ منھنجي ڌيءَ مون وٽ ترسيل هئي. سندس مڙس پسند قمبراڻي پنھنجي پيءُ ۽ ڀائرن سان گڏجي اسانجي گھر اندر گھڙي منھنجي ڌيءَ کي رسن سان ٻڌي بيدرديءَ سان قتل ڪيو جنهن کان پوءِ جوابدارن پاڻ سان گڏ رسن سان ھٿ ٻڌل ھڪ اڻ سڃاتل نوجوان کي اسانجي گھر اندر ئي مٿي ۾ لوهي سريا ھڻي مرڻينگ حالت ۾ ڦٽو ڪري مون کي ڌمڪيون ڏيندا فرار ٿي ويا. ٻئي طرف مقتول ناري جو مڙس پسند قمبراڻي ۽ سندس ڀاءُ پوليس وٽ پيش ٿيا. ھنن چيو تہ اسان غيرت ۾ اچي بينظير کي قتل ڪيو آھي. هو ڪاري ھئي، اسان کي قتل ڪرڻ تي ڪوبہ پڇتاءَ نہ آھي. هوڏانهن مرڻينگ ۽ بيھوشيَ واري حالت ۾ پيل نوجوان جي سڃاڻپ شھزاد ٻٻر ولد فيض محمد ٻٻر جي نالي سان ڪئي وئي آھي. زخمي نوجوان کي سندس وارث ايمبولينس ذريعي کڻائي ويا جڏهن ته پوليس مقتول ناري بينظير قمبراڻي جو مڙھ پوسٽ مارٽم لاءِ دادو اسپتال اماڻي ڇڏيو.
