ڪوٽڏيجي، سيٺارجا ۽ شهدادپور مان 3 ناريون مبينا طور اغوا، وارثن جون دانهون.
ڪراچي (ويب ڊيسڪ) سنڌ ۾ بدامني وڌي وئي، هڪ ڏينهن ۾ 3 ناريون اغوا ٿي ويون، ڪوٽڏيجي، سيٺارجا ۽ شهدادپور مان 3 ناريون اغوا ٿي ويون. ڪوٽڏيجي ڀرسان ڳوٺ نهال خان سوهو مان نوجوان ناري مبينا طور اغوا ٿي وئي، ناري جي والد نياز چنو موجب 17ورهين جي ڌيءَ ڪومل کي نديم گوپانگ هٿيارن جي زور تي اغوا ڪري ويو آهي. ناري جي والد موجب جوابدار گهر مان 6 تولا سون ۽ هڪ لک 70 هزار رپيا روڪ به کڻي ويو، پوليس مدد نٿي ڪري، نياڻي کي آزاد ڪرايو وڃي.ٻئي پاسي سيٺارجا ويجهو ڳوٺ ميوو خان شيخ ۾ گهر تي مبينا حملي دوران نينگري زخمي ٿي پئي، شادي شده ناري اغوا ٿي وئي.گهر ڌڻي موجب ٽن هٿياربندن اسحاق اسلامي جي گهر تي حملو ڪري فائرنگ ڪري ڏني، فائرنگ سبب 16ورهين جي عقيلان زخمي ٿي پئي، هٿياربند شادي شده ناري انيلا کي اغوا ڪري ويا آهن.شھدادپور ويجهو ڳوٺ خيرو مهيسر واسڻ ناري مبينا اغوا ٿي وئي، وارثن طرفان احتجاجي مظاهرو ڪيو ويو.وارثن موجب رات دير سان هٿياربند 17ورهين جي چمپا ڌيءَ ڀورو ڪولهي کي اغوا ڪري ويا آهن، نياڻي کي واپس ڪرايو وڃي.پوليس ڀيل برادري جي 3 ڄڻن خلاف رپورٽ درج ڪري پريتم ڀيل کي گرفتار ڪري ورتو آهي.
