اسلام آباد (ويب ڊيسڪ) غربت جي خاتمي ۽ سماجي تحفظ واري وفاقي وزير، بينظير انڪم سپورٽ پروگرام (بي آءِ ايس پي) جي چيئرپرسن شازيه مري چيو آهي ته بي آءِ ايس پي تحت عورتن کي مالي طور تي بااختيار بڻايو ويندو، انهن جا پنهنجا بئنڪ اڪائونٽ کوليا ويندا، ٻارن لاءِ تعليمي اسڪالر شپ فراهم ڪئي ويندي. هڪ بيان ۾ هن چيو آهي ته هن پروگرام جو بنيادي مقصد غربت جو خاتمو ڪرڻ سان گڏوگڏ عورتن کي بااختيار بڻائڻ هو جيڪو وڏي حد تائين حاصل ڪيو ويو آهي، هن وقت بائيو ميٽرڪ ذريعي فنڊز منتقل ٿي رهيا آهن پر اهو طريقو به ڪيترن ئي مسئلن کي منهن ڏئي رهيو آهي. هن چيو ته ان کي وڌيڪ مضبوط بڻائڻ جو فيصلو ڪيو ويو آهي، جنهن لاءِ بي آءِ ايس پي تحت فنڊ حاصل ڪندڙ عورتن جا بئنڪ اڪائونٽ کوليا ويندا. هن چيو ته بئنڪ اڪائونٽس انهن عورتن کي وڌيڪ مالي آزادي ڏيندو. سندس چوڻ هو ته بينڪ اڪائونٽ لاءِ سڃاڻپ ڪارڊ ضروري آهي پر ٻهراڙين ۾ عورتن جا سڃاڻپ ڪارڊ به ٺهيل نه آهن. هن چيو ته بي آءِ ايس پي ۾ غريب خاندانن جي عورتن کي سربراهه طور ورتو ويو، جنهن سان قومي سڃاڻپ ڪارڊ حاصل ڪرڻ جو رجحان وڌيو ۽ معاشري ۾ کين مالي خودمختياري ملي. هن چيو ته بي ايس پي پروگرام تحت ڳورهارين عورتن لاءِ صحت جو پروگرام شروع ڪيو ويو آهي، جنهن تحت عورتن کي کاڌ خوراڪ، بچاءُ ۽ معمول جي چيڪ اپ جي سهولت ڏني وئي آهي ته جيئن ماءُ ۽ ٻار جي صحت کي يقيني بڻائي سگهجي. هن چيو ته غريب خاندانن جي ٻارن جي تعليم کي يقيني بڻائڻ لاءِ بي آءِ ايس پي پروگرام تحت اسڪول ويندڙ غريب خاندانن جي ٻارن لاءِ وظيفو شروع ڪيو ويو آهي، جنهن تحت هڪ نينگر کي 1500 رپيا ۽ نينگري کي 2000 رپيا ماهوار وظيفو ڏنو وڃي ٿو.
